由於唔想太趕，所以北極熊決定咗唔去熊牧場探表親佢哋！食飽咗，係酒店再影幾張相，佢再去浸多次溫泉我哋就去伊達時代村嘞！當然行李係留返係酒店啦！未攞過咩？！

呢個電話唔影唔得呀！仲用攪盤電話，但佢又真係打到返香港噃！

係酒店附近個巴士站係大站，所以我哋順便買埋飛，仲平過去到門口買架！仲有我哋仲買埋巴士飛呀！

日本巴士有樣好，就係有字幕同每一個景點站佢會有特別聲音提示，所以坐巴士去玩都好方便！！

伊達時代村正門

呢度嘅locker係係門口出面，所以要放好嘢先好入去呀，無為行黎行去嘛！

入面就好似條古裝街咁！

唔知點解六月就已經有紅葉，仲要係咁紅！！

話明係忍者村，就梗係有人扮忍者！呢度仲會每人派一張紙俾你試吓好似以前ｄ人咁，用張紙包住ｄ錢拋小費上台！

呢套其實係諧劇，所以ｄ忍者都有ｄ．．．．低能

表演完ｄ演員係會同大家影相架！

唔知以前ｄ坑渠係咪咁架呢？

睇完忍者又去睇下當年ｄ人嘅生活情況！呢個劇場係反映當時妓院情況！而呢位女演員反串男裝做．．．龜奴！唔知係咪旅行團ｄ飛同我哋有分別呢？記得上次同貓母后黎係無呢個睇，就要去食晏仔！而今次我哋排隊果陣，呢個女仔問我哋係邊度黎，佢一知道我哋係香港就問我哋攞飛睇！不過，佢都好識講笑，你派小費紙果陣，佢提我哋同另一家香港人，千奇唔好俾港幣佢呀！！

呢位係日本觀眾，俾人即場請上去做〔嫖客〕

佢就係名妓嘞！靚呢家嘢！各有各喇！

同樣佢哋係好樂意同大家影相

睇完出黎見到佢哋嘅吉祥物〔貓太郎〕，但似狗多ｄ囉！

為咗呢餐晏仔，我哋用齊英文，日文同身體語言，總算有得食！

北極熊嘅烤羊飯

貓女王嘅薑汁豚肉飯

食飽飽之後，我哋去咗影低能相，即係果ｄ帶晒假髮同著晒和服果ｄ！！

之後就去忍者屋玩嘞！其實都係好低能，不過ｄ畫工幾靚架！

好奇嗎？開黎睇吓吖？

望吓個時間表，就到露天表演時間，都係早ｄ去搵位先！

忍者原本係會用喇叭架！

坐係等一行最遠係頭頂札起頭髮果個女人係同我哋同酒店架！食早餐果陣見佢仲著住浴衣，以為佢未攪好自己，但原本佢咁都照出街架喎！

童謠表演，佢一路唱一路用佢手上嘅道具做出唔同嘅表演！

嘩！！忍者呀！！點解係上面黎嘅？

點解個忍者ｄ頭髮係紅色嘅？？

殺呀！！！！！！！！嘩！！佢個眼袋好大喎！！

表演完嘅指定動作．．．．影相

蒲公英呀！！呢度四維都有！

原本好想去睇貓吉劇場，但等極都無，原來佢瞓咗！

四維行果陣見到有半開嘅蒲公英

結果去咗低能鬼屋．．．真係好低能架！入到去要自己按個制先有鬼俾你睇，乜鬼都唔驚啦！！

仲要黎黎去去都係得ｄ單眼鬼

最恐怖都係佢囉！　

無諗過阿河生發嬲係咁恐怖架！！！

仲要對住我噴水呀！！！！

之後我哋又去埋貓屋

其實呢度先最似鬼屋

之後再去睇吓當時ｄ民生咁啦！！ｄ公仔原本係會講嘢同有動作，但個感應好似壞咗！唔係個個都有反應

去完呢個被北極熊形容為〔日落黃昏〕嘅景點之後，我哋就打的返去地獄谷嘞！

點都去影張日景咁啦！

遇到一家大細去嘅香港人，幫佢哋影完，佢哋都幫我哋影張！

跟住我哋就去睇個低能節目－－變瞼

呢個係變臉之前嘅做型，

經過一輪鑼鼓聲之後

睇完又係時候趕車嘞！呢ｄ就係登別站內裝飾

唔知因咩解究，呢個站要係JR埋站之前七分鐘先俾入閘，攪到我哋鬼咁唔安樂，因為我哋又要將ｄ行理用腳行上天橋去對面越台嘛！好擔心行唔切架！！不過好彩仲可以影張相先

就係咁．．．D90就踏上咗佢嘅死亡之旅．．．．．

因為．．．我哋ｄ行李．．．都真係有ｄ多，所以就要用埋前面坐位個架黎放嘢！點知過咗幾個站之後有位阿嬸上車坐果個位！咁！北極熊為咗讓返ｄ位俾佢，就順手將部D90放咗係椅背張枱面度，點知佢一起身，就拖到條帶，咁．．．D90就從高處墮下．．．．就係咁！佢就分咗體！北極熊居然一句粗口都無講，不過好明顯．．．．赤到上心口！！！而貓女王好冷靜咁．．．繼續將佢拆得再散ｄ！！因為支２４－７０扯咗個mount出黎呀！！咁咪拆埋去囉！！之後我哋包好佢！而北極熊為咗平衡吓自己，就買咗個〔板壽司〕同啤酒！！

我哋懷住沉重同哀悼嘅心情去到函館，希望果度會有ｄ維修中心之類嘅地方啦！不過．．．．當我哋係架的的到果陣就打消咗呢個幻想！！乜．．．．咁．．．荒蕪嘅？？去到酒店有位中國女生係度做part time，當然佢係講國語，但．．．都算有親切感嘛！我哋一心佢會話到俾我哋知邊度可以整返部機，但．．．連佢ｄ日本人同事都唔知！！不過算啦！！仲有部細嘅頂埋呢兩日嘅！

由於我哋遲咗去到，已經過咗晚飯時間，所以佢哋俾咗每人三千日圓嘅coupon我哋去二樓間餐廳度食，而最重要係佢果句〔我們左手面這一家商店是二十四小時營業，晚上有需要可以在這裡購物，只需要出示房匙號碼，就可以記帳〕！嘩！！連錢都唔駛帶呀！！！好驚呀！！！真係買買吓就買晒ｄ錢！

上到房都真係洗個面換件衫就去食嘞！

唔記得咗影，呢間酒店係比登別果間講究，佢有兩對拖鞋，兩款浴衣同襪俾你！兩對拖係因為有一對你可以著黎行出酒店門口以外地方，兩款浴衣係因為一款要俾你四維行，一款要黎瞓覺！！

呢碗係我嘅半份版鹽味拉麵

好嘢！！食得喇！！！

北極熊嘅壽司盤

冷豆腐，同香港食開ｄ形狀唔同，佢哋好似實淨ｄ嘅豆腐花咁

炸八爪魚

刺身盤

食飽飽，望吓張單，簽個名就走得嘞！因為係留返你check out先同你計！！

返到上房，北極熊都係肉赤咁望住部D90同支24-70！而貓女王呢個時候就發揮佢嘅神奇力量．．．．將佢整好咗！仲影得相，好靚添！！

所以北極熊心情即刻好返，有晒心機去浸溫泉，而今次個溫泉仲要唔駛行出房，係自己房度對住個海黎浸呀！！不過因為夜晚，黑到咩都睇唔到啫！！！

Day 8預告　－　五稜角公園，加日本蠢男！

第六日嘅早餐依然係旭川食，因為唔想搬行李，所以我哋揀咗係旭川瞓多一晚而唔去富良野住民宿！

對面間屋經過我哋出去玩咗一日之後得返

由於隻北極熊扭扭拎拎，唔知去唔去美瑛好，結果．．．走咗班慢吞吞號觀光火車！一分鐘，就只係一分鐘，令我諗起．．．差不多先生！咁咪有藉口再黎囉！

所以改坐普通火車

北極熊作品－車長之野望！其實個車長好好人架，雖然佢不停都係同我哋講日文

呢包十勝奶令我諗起楊芊樺首歌－〔原來過得很快樂只我一人未發覺〕，佢係我過去幾日飲過算係好味嘅，原來最好嘅已經運晒去香港！！

其實塞翁失馬又焉之非福？搭唔到觀光慢吞吞號，但可以見到民生百態！呢兩位小姊妹，由媽媽送上車，同我哋一齊出發，但媽媽無同佢哋一齊去噃！妹妹可能細個ｄ，唔知咩事，又或者一心去玩，但我哋見到家姐仔，眼有淚光，又要強忍照顧個妹，仲要數住幾時落車

即使沿途風光明媚佢都無咩心機睇

過咗都好多個站之後，佢哋都要落車嘞！有一位嬸嬸接佢哋，唔知係親友定係婆婆呢！？不過如果係香港，佢哋父母應該被控虐兒，疏忽監管等等一大堆

再坐多幾個站就到美瑛嘞！！

係車站對開就已經有單車出租，仲要係有得用電架添

不過我哋係度都攪咗陣先可以出發，因為佢ｄ單車太高，而且．．．我一早都話咗我好耐無踩過架啦！！仲有我不嬲都係踩三吓停一停好安全架嘛！！

唔知係咪未係花季沿途無咩花嘅？

途經卡樂B廠，可惜不對外公開

推車推到死就係黎呢個瞭望台

十勝山，北極熊好想去架，不過要下次喇！

企咗陣就有團成４０人嘅香港團嘞！搵咗個識講廣東話嘅幫我哋影返張先！

好彩上瞭望台之前已經係度食咗薰衣草雪糕同補給咗！一有團就迫lu！！

貓女王出巡喎，更係駕勢ｄ坐三個轆啦！！

其實我真係唔係好明，踩餐死黎睇棵樹，為乜呢？仲要本本旅遊書都介紹，同埋講到唔係人人識黎要行家先知！但我眼見ｄ大大架旅遊巴，一車一車咁黎！睇黎ｄ行家好多噃！！

我對棵樹無咩興趣，反而有樣嘢想做好多年，家陣有機會嘞！

單車的背影！你兩架自己踩返去啦！我同北極熊坐車得喇！　　　　

其實係度踩車都有ｄ危險，因為會有大型車輛係身邊經過，而且開頭係要上斜，所以都要一定嘅體能！

美瑛嘅渠蓋　　　　

就係係呢度租單車嘞！老闆係位大叔（未到阿伯），佢好好人架，會問你租幾耐，俾埋地圖教你點去ｄ景點架！！記得要幫襯埋鮮奶呀！

呢樽好好飲，有返我九年前係北海道飲嘅味道，可惜得一樽

呢樽差少少，不過有貨，所以係車黎之前跑去再買

好彩買完都仲有時間影相

好味到傻咗，北極熊仲失晒儀態添

好快咁又返到旭川

係往富良野／美瑛嘅月台行返去站頭條隧道係唔同架

俾北極熊見到佢有開檔添

不過因為要返酒店攞行李，所以無買到！由酒店去JR站真係行都得，但我哋大包細包，所以都係．．．的的啦！

咪見我哋四點鐘就係車站以為會好早去到下一個目的地呀！其實呢次係最耐架！因為我哋要由旭川返札幌，再去登別，所以去到都八點lu！

等到啦！！係佢啦！動物園號JR！！

我哋坐呢卡，企鵝卡

放好行李就即刻去搵北極熊卡嘞！

某程度上，呢卡係兒童樂園

坐到佢大脾喇！！！！

佢哋仲有位獅子姐姐黎講故仔

之後我哋又續卡去影相

係車上想飲嘢唔煩，因為有自動售賣機！

唔覺唔覺就到站lu！！

同動物園號bye bye之後，我哋就要轉車去登別嘞！由於我哋係旭川車站遇到一位英文唔錯嘅女職員，所以我哋順便搵佢攪好晒之後幾程車嘅位！咁！有咗指定席就唔駛唔知點同人爭啦！所以我哋好順利咁上咗車，仲可以有時間去買〔駅丼〕，即係北極熊好恨食果ｄJR便檔！

貓女王嘅和牛弁当

北極熊嘅魚生飯

雖然話咗去到又有飯開，不過有得係JR食吓飯ｄ時間又好過ｄ嘅，所以唔覺唔覺就到咗嘞！不過．．．唔知點解？？好似好大霧同好寒．．．咁嘅？！

不過當北極熊發現呢度係無電梯，要自己搬ｄ行李上我後面ｄ樓梯去站頭，即刻好滾，唔再寒嘞！！所以話．．．登別對ｄ遊客真係．．．體貼！！

我哋兩個就係靠自己將一個篋，一個70L加一個35L背囊，一部notebook再加兩袋手信，搬過咗條橋！出到去見到有架巴士寫住去登別溫泉就上咗車嘞！落咗車都要上少少斜路先到門口！！不過今次好ｄ，因為前台位哥哥仔係會幫我哋搬ｄ行李上房，係電梯入面佢同我哋傾計，北極熊仲話咗俾佢知我哋黎honey moon！

入到房有位姐姐仔着住和服招待我哋！佢即刻沖茶俾我哋飲！同埋佢係負責我哋餐懷石料理嘅！

就係佢出出入入嘅時候我哋就係房到換日本浴衣嘞！係溫泉酒店着住浴衣四維行，食飯都係好正常嘅事！

估吓係咩黎？？

咪就係酒店浴衣條帶囉！！一條過好易用！不過貓女王就有ｄ．．．麻煩，因為着着吓唔記得條帶點綁！！

由於我哋位姐姐仔都唔識攪，結果要勞煩隔離房做緊嘢位嬸嬸過黎綁！

而我哋位姐姐仔就繼續整嘢俾我哋食嘞！

返到黎先知唔係季節，ｄ長腳蟹居然無味！

睇見枱面嘅食物，好似幅畫咁！

每一碟一鍋都唔大！但已經食得你好飽

我都係鍾意北極熊碗湯多過自己呢碗

呢個雞又甜又酸好開胃

呢個牛腩撈飯好好味架！

呢對筷子係酒店送俾我哋嘅結婚禮物！！

終於可以食喇！

仲有點少得北極熊新歡呢？係日本只要你行去電梯口就有自動售賣機！

由於我哋好夜先到，所以呢頭食完，佢哋跟手就鋪床俾我哋，為免阻住佢做嘢，我哋就出去行街街！

由酒店沿斜路上就有一個泉眼位，可能啱啱係時間所以好大霧呀！

再行上ｄ就有地獄谷兩隻惡鬼！

再行上ｄ就係地獄谷嘅泉眼位嘞，不過因為無燈，咩都睇唔到

我哋之所以走黎登別住一晚都係為咗想睇鬼火祭，點知ｄ旅遊書又錯，原來係每年六七八月嘅逢星期四五！唔係星期六日！都係果句啦〔仲信唔信旅遊書吖？〕，結果北極熊都係唔憤氣要行上山睇吓！但我踢拖喎？！

係登別呢度，會有唔同酒店嘅客人着住套浴衣通街行，包括去七仔，所以我哋都一樣係咁去！對ｄ職員黎講，都只係唔同酒店嘅客咁啫！

入到去，我見到有Hello Kitty嘅煙花（即滴滴金）賣，我好想玩，但俾北極熊禁制咗，佢話玩完就無喇喎，唔俾買喎，結果係買咗個Kitty燈籠，北極熊話中秋可以有得玩喎！！不過，我亦都証明咗一樣嘢，男人係唔鍾意玩滴滴金架！！因為佢唔係第一個！！

唔知點解呢間七仔好似零舍多酒賣咁嘅？？起碼佢有〔地獄鬼鬼〕版

仲有呢罐，北極熊話唔捨得飲所以無買

唔睇清楚以為係礦泉水

佢哋連酒都興用紙盒裝

我哋係七仔除咗買咗個Kitty燈籠之外，仲買咗ｄ鮮奶同布甸咁啦！北極熊仲買到佢鍾意嘅手信，就係足球小將球衣掛飾，其實係用黎抺手機面嘅！

跟住我哋行返酒店，係門口搵咗位食蕉叔叔幫我哋影咗相到此一遊！

跟住就返上去食吓布甸嘆吓溫泉嘞！

Day 7預告　－　伊達時代村，同日加影D90+24-70之死

由於我哋係第四晚已經係旭川，所以早餐係係旭川酒店食！當然．．．唔係吸引！其實北極熊由酒店門口果刻開始已經唔鍾意間酒店！因為當時已經好夜，而我哋又大包小包，的的去到酒店門口，但入邊個職員又唔出黎救我哋！所以佢已經話有無攪錯？！不過我都係果句啦！〔日本ｄ酒店唔興有bell boy架！〕入到去，果位肥仔．．．都真係．．．你係咪返工架？？不過都好彩佢識俾返我哋對杯我！好嘢！！收到喇！！小樽自製玻璃杯！話說回頭，間酒店好似得佢一個當夜咁！所以想搵多隻手幫吓都無，於是我哋又大包小包咁上房，一入到去．．．北極熊彈起！！對我黎講無咩問題！因為間房同我已前同貓母后係北海道住嘅一樣咁細！個廁廁亦係一舊膠〔原身啤出黎〕果隻！！但，當然比起我哋之前幾晚住果ｄ．．．．差好多啦！！仲要有陣煙味！！佢火都黎埋！！我哋成個honey moon on package list最貴係呢間房，最差亦係呢間房！！由於夜晚咩都睇唔到，所以到第二朝先知，原來對面拆緊屋！

食完早餐就由酒店行過去巴士站，等呢架巴士

係巴士度見到當地消防車

係架車到搖吓搖吓，瞓醒就到咗

去到當然要先買飛入場啦！跟住就係locker放低ｄ嘢，因為早幾日都有ｄ涼，所以帶埋件褸，鬼知呢道咁熱咩！！跟住就要同個地標影吓相嘞！

仲有騎吓ｄ好耐無騎過嘅

坐咗咁耐車，係玩之前好應該去解決吓！呢個廁廁出口同入口係分開架！

係呢道汽水機唔係用黎賣廣告

由於有一大班人同我哋一齊入黎，所以我哋避開佢哋先黎睇海豹，但入到黎一樣有好多人係道！乜大家咁早呀？！

佢哋肥嘟嘟好得意呀

仲有個鼻哥窿會一開一合咁，開咗好大呀！

睇完海豹都係時候去探大伯爺嘞！一去到就見阿二伯爺行黎行去好唔得行喎！

佢老婆二伯娘就掛住游水唔理佢

啋！北極熊低炒二佰娘呀！！

有ｄ忍唔住想”R”吓二伯娘隻腳板底，仲有攪吓佢條尾

一場親戚咁遠黎到點都要一齊影張嘅

行到上去見阿二伯爺係道行呢行去

之後阿二伯爺又帶埋舊玩具落水玩

難得佢兩公婆一齊玩唔爭喎！

嘩！阿二伯爺個pat好得呀！

係呢道ｄ指示牌係同個館有關嘅！

仲有壁畫介紹

佢呢道有個得意設計係可以俾你近距離同大佰爺say hello！就係捐入呢個半球體道嘞！可惜影唔到大伯爺！

係門口出門就可以見到大伯爺嘞！

唔知做咩佢呢日個身鬼咁痕，真係好想幫佢”R”吓

但北極熊就衰啦！掛住ｄ短裙仔

攪到大伯爺都無眼睇

之後我哋順便過對面屋探埋表叔公

再黎北極熊話想去試吓佢係北極無食過嘅企鵝，又話民建聯將ｄ企鵝引入咗北極嘅，點解仲未見到架？！

佢唔知係咪見到北極熊驚得滯，居然拖馬

但北極熊更有氣勢，所以企咗無三分鐘齊齊鳴金收兵

既然係咁！咪我哋落去搵佢哋囉！點知佢哋係我哋頭頂〔飛走〕喎！

出返黎見到呢架車，我真係好想坐架！！但北極熊話係老弱婦孺先俾坐！我咪婦孺囉！！

不過因為咁所以我遇到佢，係咪好大隻靚仔呢？

之後我哋繼續向農舍行，黎到呢到，都真係有ｄ有感而發，好想叫香港ｄ衛生官員黎睇吓！係呢道有齊水喉同洗手液俾大家，而且每個人都好自律咁接觸完會洗手，何必要趕盡殺絕呢？

而我．．．為咗入境唔駛煩，所以只係同咗佢影相

係農舍留咗一陣就去探細表姐嘞！曬到佢吖！

去到佢啱啱食完飯，仲清理緊屋企，不過佢執嘢嘅方法幾特別！

而佢有位朋友黎探佢，唔知係咪熱到傻咗定係太口渴．．．．

之後佢仲．．．．．唔通真係熱傻咗？！

為免我哋都傻埋，都係去睇吓二叔好ｄ嘞！咦！？佢瘦咗好多喎！

由於都真係太曬，我哋都係去食咗飯先！其實係二叔屋企隔離就已經有條樓梯上去西閘果邊食飯，之但係都真係太曬，所以坐小巴去！

果道都只係食ｄ快餐咁！總之食得你飽無特別！特別嘅係北極熊支啤酒！

係呢道有樣嘢係我哋唔明嘅，佢哋係會著住套校服黎動物園，當然唔係指套PE衫啦！係著晒校服裙同打晒校呔！而且仲有ｄ人係著住套西裝攞住公事包黎架！著校服就話係學校旅行啫！咁果ｄ著晒高跟鞋，同西裝嘅人呢？

我哋著成咁好明顯唔係本地人

食飽飽又shopping完就同西閘嘅地標影返張

之後我哋行樓梯返落去，再去二叔道，你睇佢身手敏捷

到底有ｄ咩睇呢　　

之後我哋去咗猩猩館，佢哋係鍾意係你頭頂行過

仲鍾意賣嘢俾你飲　

原本想睇小鹿但佢口蹄症，唔俾入，所以去睇柴狼，但影佢唔到，因為佢有保護色影出黎唔靚　　　

結果，我哋又返咗去搵大伯爺

睇黎大伯爺都好健康，無乜脷胎噃

由於同大伯爺傾計係無櫈坐，所以都有ｄ攰，咁就行埋去坐吓啦！見到有位小妹妹，唔知佢阿爸阿媽係邊，但佢就好串咁擺晒post

跟住我哋又去咗海豹館，諗住晏咗可以少ｄ人嘛！就係我睇緊一隻肥嘟嘟嘅海豹時，佢居然．．．．．．

咁都算啦！但佢居然唔洗手，唔自己清理！！真係．．．太過份喇！

睇完呢ｄ生態奇觀之後我哋去咗shopping仲買咗布甸食！

之後我哋就兵分兩路，因為北極熊想再去食多幾隻企鵝，

但我就想去shopping！所以我哋約咗係公廁對開ｄ櫈等！原來果道仲有部汽水機未影喎！

其實呢個時候佢哋又已經播晒歌歡送大家，不過都真係唔捨得走影多兩張先啦！

就係影呢張相果陣，我哋聽到一把聲，仲要係講廣東話！！後面有一個單身香港男子，問我哋係咪要幫我哋影！好嘢！！佢仲係用大機架！！影咗相再傾咗幾句，就走嘞！哎呀！！唔好意思，唔記得問你要唔要幫你影添！！有緣見到面再幫返你！

係locker攞返ｄ嘢之後就要行出呢個門口，好唔捨得呀！！！

不過出面ｄ景都唔差架

我仲以為旭川ｄ渠蓋會係北極熊添

返到出去，係附近行咗陣，亦都因為咁北極熊行錯路，俾我發現咗間賣日本浴衣嘅鋪頭！初初都只係行埋去睇吓！因為好記得九年前同貓母后係札幌，被拒絕嘅情況，所以心諗都係得個睇字！但，點知呢家人真係肯賣俾我，仲好好心機咁幫我配腰帶同搬個公仔入黎教我點著！！好好人呀！！之後我見佢哋枱面有ｄHello Kitty飾物咪多手攪吓囉！佢哋叫我隨便睇，北極熊就用佢有限嘅日文加英文話俾佢哋知我好鍾意Kitty！佢哋居然送咗一條頸鍊俾我！！呀！！！超唔好意思呀！

返酒店放低ｄ嘢，都係時候食晚飯嘞！我哋又係去食拉麵，而呢間係我係北海道最鍾意嘅！　　　　

北極熊嘅豉油拉麵

貓女王嘅鹽味拉麵

食飽飽，我哋慢慢行去JR站影相

站入面係可以俾大家影低能相架！

呢晚比較好彩，前台位職員ｄ英文比佢位肥仔同事好，佢解決咗我哋打唔到電話返香港個問題，雖然最後都係無打到，但起碼佢解決咗我哋之後去登別會遲嘅晚餐問題！

Day 6預告　－　美瑛搵命博之旅

繼續瞓到唔知醒，不過今次仲過份，唔只無早餐食，仲係俾樓下打上黎吹我哋走！吓？！乜咁晏架喇！結果．．．北極熊同佢講加一個鐘，等我哋可以唔駛急！罰錢！！！罰咗一百蚊日圓囉！係大堂寄存ｄ行李，跟住再係酒店慢慢影相同食晏仔！

反正都無食過佢ｄ早餐，咪去食晏囉！

呢間酒店係井字型，所以係中間有個花園

佢沿住個邊都係露台位

係咁咦有條懶靚樓梯

ｄ繡球花好靚呀，全部係真花，呢個亦係北海道可愛嘅地方，唔用假花！

好古式古香嘅電梯

係北海道，只要你揀ｄ懷舊嘅酒店就有呢ｄ電梯

為咗呢兩張相，北極熊要我玩電梯呀！！

連個制都好懷舊　　

食飽飽就去白之戀人工廠嘞！坐類似地鐵嘅鐵路去都係半個鐘至九個字度啦！途經一間洋服公司，如果你有睇過〔反轉豬腩是王子〕都會覺得好熟口面！

到啦到啦！！！係白之戀人呀！！

門口好似去咗間豪宅咁！又似公園噃！！

入到去先問咗係咪可以做一罐有自己樣嘅白之戀人先！我哋連相都帶埋去架喇！但佢話要即場影喎！咁好啦即場影啦！一個鐘後有得攞！

記住要俾錢先呀！！

就係咁！我哋就參觀佢哋呢個〔樂園〕嘞！一黎就有貓腳印帶你行！

沿樓梯同腳印指示　

會見到一個十五週年介紹！陣間會再見到佢哋！

上到去繼續沿住腳印行

佢會帶咗我哋去一個噴水池邊

 由於只有日文，所以我唔明有ｄ咩關係

再行入去有間有個好靚嘅屋頂嘅房

介紹朱古力熱飲嘅壺

連地磚都好有懷舊feel

仲介紹唔同年代朱古力盒

但唔知點解有兩件咁嘅衫

亦唔明點解有古董流聲機表演

之後我哋入去．．．睇朱古力

實物一比一，嘩咁咪好大！！

呢度就係工廠嘞！

繼續沿住樓梯上，就係學習工房同餐廳

由於溝通問題，以為自己錯過咗當日最後一班白之戀人，但原本呢班係父親節班

所以去咗Cafe坐，呢度可以望返落公園架

我哋去到有一大班日本阿太係度望住個鐘樓，佢哋怕曬坐入ｄ，但又要望住個鐘

原來佢哋係等個鐘表演

係咪好熟口面呢？ｄ演員？

咪就係樓梯見過囉！

 當呢個表演完咗，佢哋以９秒９極速消失晒！

日本真係樣樣嘢都好細緻，連出面欄杆都有對貓係度，係佢哋嘅一個標誌！

北極熊嘅１５週年芭菲

黎到呢站，咳到死我都要食扭紋雪榚

當然試吓佢哋ｄ熱朱古力啦！但．．．唔係我想像中咁！唔識講，有機會試杯啦

我哋啱啱遇到隊新加坡攝制隊

佢哋係有一個足球場俾佢哋士幫沙嘅北海道隊練波嘅！

窗邊仲圖文並荗介紹遠處山景

我哋就係坐係有背囊果張枱

食完tea我哋又繼續行！

行行吓又去返ｄ古董音響度，見到有三個喇叭，分別係（由左至右）金屬，木片同紙造，我哋試完都係覺得紙造ｄ聲好ｄ！！

之後我哋又繼續行，跟住落黎見到嘅嘢唔好問點解會出現，因為我哋都唔知點解會有ｄ咁嘅嘢同埋佢哋有ｄ咩關係？！

無啦啦有個真實之口

無啦啦會有個用爛鐵整嘅鐵騎士

到處都係腳印仔

跟住無啦啦有Hello Kitty

又會有米老鼠嘅畫

又唔知點解會有黑武士

仲有幾櫃鐵皮玩具　

又唔係好明點解會有個模擬家庭係度

雖然唔知點解會出現，但真係好鍾意呢個廣告

其實呢度好大，大道可以有條咁嘅樓梯

貓女王咁留心睇緊咩？

咪就係睇佢哋囉

由樓梯行落去，又到咗shopping嘅地點嘞！係咁咦買少少啦！因為白之戀人四維都有，呢到又無平，所以可以遲ｄ先買，反而買咗出面無嘅曲奇！

係我買嘅時候北極熊又去咗．．．影相

呢到ｄ嘢周不時會打開同表演

我哋叫攝製隊幫我哋影咗張相

係花園度有好多屋仔，仲全部都可以入去玩

走之前緊係要記得去攞返盒有自己樣嘅白之戀人啦！

成間工廠都好歐洲feel

白之貨VAN，有兩款架

去完白之戀人之後就要趕返去市中心嘞！因為要去啤酒廠！！

黎到都已經太陽落山lu！！不過ｄ旅遊書話收十點嘛！唔怕啦！！

跟住咩都唔理就衝咗入展覽館

但我哋行行吓覺得有ｄ唔妥，明明係去Sapporo啤酒廠架！點解個招牌？？

同埋點解入面會係咁呢？？

仲連試酒嘅地方都收工？？八點咋喎？！又話收十點？！

連買手信嘅地方都收？！快ｄ影低隻北極熊先！

好彩仲有間酒吧餐廳未收

坐低咗叫咗嘢食，再攞ｄ書同地圖出黎睇，先知呢度係舊廠，家陣轉咗形！！而新廠係同呢度反方向行嘅！都係問北極熊果句啦！〔吓？！你仲信ｄ書呀？〕

北極熊嘅啤酒set，不過佢話唔係全部好飲！

好大杯呢？佢無咁過份飲四杯，呢杯係烏龍茶黎架！！

呢度有唔同款嘅啤酒杯賣架！

仲有ｄ唔知係邊個嘅名人簽名酒杯

唔知ｄ燈係咪以前用開果ｄ呢

對貓女王黎講係北海道最痛苦嘅係，唔係度度都有熱水或熱茶飲，所以北極熊就用佢嘅體溫去〔翻熱〕杯凍烏龍茶嘞

呢個係北海道牛奶煙肉牛油粟米，好好食又香又甜

焗蟹蓋，芝士好好味，但ｄ蟹．．．？？

長腳蟹壽司，可能唔當造掛，無味囉！！

係北海道佢哋係會善用舊嘢唔好嘥架

啤酒儲存器，呢間酒吧餐廳賣嘅係自己啤酒

食飽飲夠，我哋又要返酒店攞行李嘞！下一站旭川！！

Day 5預告　－　去同大伯爺見面，旭山公園動物園

由於瞓到唔知醒，所以係錯過咗早餐時間架！於是匆匆咁係酒店影咗呢張相就出發嘞！

既然無早餐食就出去食啦！途中見到呢張海報，影低先，因為我哋就係為咗睇佢呢個跳舞祭而黎札幌嘅！但佢哋除咗海報係無其他資料嘅！

又見到呢架去大倉山嘅觀光車，可惜無時間坐！

呢間麵店ｄ麵係有影到，不過唔俾大家睇都算啦！因為係我咁多餐最難食嘅一餐，佢最出名果碗黑醬油拉麵係要千幾日元架！最貴係佢最難食都係佢！認住個門口，見到唔駛入去架！！

之後我哋就去咗道廳嘞！

係入門口度有位叔叔坐咗係一個好似售票處嘅地方，但其實係免費參觀架！係樓上有一個好似office嘅地方，呢個係問嘢嘅好地方，因為入面有位姨姨ｄ英文好好，佢會教你去想去嘅地方，係比酒店ｄ職員講得清楚！！不過記住要花少少時間睇佢哋套片，呢個．．．係禮貌！！

唔明點解係道廳會收藏呢ｄ嘢？

係呢度又有班女學生黎做功課

九年前貓女王同母后就係呢度凍到跳舞！！係我當年成個北海道之旅最凍嘅一站

跟住，去咗一個我哋無預定會去嘅地方，但見唔駛行好遠就去埋啦！

真係行無幾耐就見到佢

赤十字会館，就係隔離街之嘛！點可以唔去朝聖吓呢？

如果佢有得賣，我好相信我會帶佢返黎

都真係唔係想〔崇洋〕但．．．點解人哋ｄ章同制服係靚ｄ嘅？！

人哋仲有〔代言狗〕，我哋問係咪真係有狗狗做搜索隊去救人？竹中san答無，純粹係image，咁都已經好吸引啦！起碼令我哋問佢有無隻杯賣先吖！可惜當年只做咗２５０隻送俾活動參與者！

佢哋ｄ舊章同制服都好靚

呢個係特登影俾Tony sir睇嘅〔南丁格爾章〕，日本都有位前輩攞咗，以佢有限嘅漢字介紹，我哋估位婆婆已經仙遊咗，所以送返出黎展覽！

上次河生河太黎果陣係自助，我哋今次都係，所以有盞小燈

只係俾我哋遇到竹中san，問咗佢有無杯賣，同傾下計咁啫！咁！就有紀念品嘞

打劫嘅成績唔錯，我終於有個好啱去enrollment用嘅袋嘞

之後我哋繼續向大通公園出發，果度係跳舞祭嘅場地

係呢到係會有好多人全副武裝

果度係有分有料同無料，即係話俾咗錢你可以有個位坐，無俾錢要坐地下！對我哋呢ｄ外國人呢講係有ｄ唔知點算，因為無睇過，香港無介紹過，而且佢哋無英文介紹或指示協助你！咁就靠自己去了解！我哋用英文問派單張（日文only）個女仔，係咪要買飛，佢就手指指咁指我去前面，但我哋用簡單日文加英文問佢入去無料區係咪唔駛買飛佢又點頭加手指指去前邊噃！！之後我哋行去前邊，有位阿生，佢唔係好識用英文同我哋講，但識聽多過果個女仔ｄ啦！！起碼佢可以令我哋知道坐地下唔駛錢囉！之後北極熊又問佢邊場好睇ｄ，咁就一場坐地一場坐櫈啦！佢原本話唔知，正係我哋想買晒兩場之際，佢叫我哋買夜ｄ八點幾果場！因為六點幾果場係學生表演，但佢又無介紹八點幾果場噃！不過都信佢啦！之後我哋返咗去坐地下！由佢哋彩排開始睇！

唔知點解，我同北極熊每次一見呢位表演者出場就想．．．．〔鍋〕佢

仲有太鼓伴奏架！呢個樂團有位〔電車〕fans架！

雖然係彩排，但每一位都好盡情同落力架

呢隊係大學嘅樂團，我都只係見到佢哋分幾鐘就俾其他跳舞嘅表演者遮住咗佢哋

最前排就係呢班小學生

呢位美少女當日絕對搶北極熊支鏡

但都要影吓隔離嘅〔可樂排房〕嘅！

雖然排房ｄ排好似倒模咁，但佢哋跳得好落力架！

就係彩排緊果陣落雨，大家都有備而黎

我哋之前果晚係無睇天氣報告架！純粹好彩有帶

望上去就係有料區，都只係得排櫈

係表演前係由表演者出黎set場架

等到正式開始．．．衝呀！！！

我真係覺得中間呢果女仔好似前SO伍姑娘，但北極熊話唔似喎！

就算跳到傷晒，紮住都仲跳得好開心

無論男定女，大定細都好盡情呀！

除咗呢位小朋友，好似被迫咁

其他人都跳到忘我

睇完ｄ學生表現我哋就要先去電視塔嘞！如果唔係就影唔到夜景嘞！行行下俾北極熊見到佢親戚，點都要影返張嘅

札幌電視塔，雖然只有147.2M但已經令當地人好自豪！

由觀景層影落大通公園，遠處發光輁門就係跳舞祭地點

雖然呢度無低能相影，但都有低能金幣

夜咗佢就會好似聖誕樹咁

雖然餐晏仔好難食，但〔掃街〕香港人又點會放過

係日本買魚仔餅要小心ｄ，唔一定係甜，即使我哋問咗呢位阿哥〔Sweet?〕佢答係，但個結果．．．係鹹架！唔好同個唔識日文嘅講〔個牌寫咗呀！〕

好好味嘅燒魷魚，原本仲有隻燒帶子，好大隻，但貓女王太肚餓．．．食咗！

由於時間關係，我哋攞住幾串串燒就返去現場，排埋隊（佢哋放人好慢呀），入到去個司儀已經介紹ｄ人啦！而且之前落過雨，入場嘅人都有ｄ狼狽，又要抹櫈，又怕遮住人，我好好彩有後面位嬸嬸俾張單張我墊住坐！原來夜晚真係好睇好多，而表演嘅都係大機構！

佢哋有趣嘅係，係你睇唔切果陣變咗身

呢班就係可樂嘅員工，雖然唔靚，隻舞又唔吸引，但好落力跳架！

變身後！快到影唔到！

佢哋手上嘅就係跳舞祭一個重要道具

哈哈！！今次影到啦！

佢哋唔多唔少都會買吓告白，俾人知係邊間機構

有ｄ重會出動親情牌，〔親子〕不過多數都無咁好睇

因為ｄ細路成日遊雲

有ｄ隊伍一黎就俾個品牌你睇

著背心都有得除

呢班係一班大學生

大家都無諗過佢哋除得咁徹底，所以全場大笑

但亦都因為咁，所以更有祭典嘅氣氛

係司儀介紹呢隊果陣，後面位阿嬸已經叫咗出黎，所以我哋即刻估到係好好睇，仲用細機影movie添，但轉record果陣唔知係電腦定張卡有問題，攪到無咗！

佢哋除咗跳舞，仲有樂手同歌手現場表演

可惜條片無咗，如果睇到佢哋表演．．．簡直一流呀！

有五分一嘅人睇完呢隊之後走咗

每一隊都出盡力表演

即使看似平凡，突然又會多姿多彩

驚喜一浪接一浪

自己都唔知睇咗幾多隊，因為唔係隊隊ｄ相都放入黎，有ｄ真係悶到你走！但就算好似我哋咁睇晒，點都要走嘅！

雖然表演完咗就等如呢晚嘅活動都完結（佢哋一連幾晚，我哋係開幕果晚睇），但我哋都盡最後努力去shopping！！買咗幾件T-shirt同一支髮簪，吊住果個就係跳舞小道具

Day 4預告　－　白之戀人朱古力廠

第二日一早食完酒店ｄ早餐，我哋就去睇吓果間鋪有無得學嘞！由於我哋遇啱有東京嘅學校黎excursion，所以我哋去到時啱啱有幾位學生係到！於是我哋就係出面張櫈到等吓嘞！不過好曬呀！！

如果去學嘅朋友仔記預先除低手錶或飾物放好呀！如果唔係就會好似我咁唔記攞返走！

過程中係好安全嘅！雖然佢哋ｄ英文唔叻，但係會好努力同好小心咁幫你嘅！

哈哈！！好容易就完成咗我哋隻杯嘞！不過記住佢係要用一日去凍架！

估吓邊隻係邊個整？

做完隻杯，我哋又去行嘞，途經有間被棄置咗嘅酒店，同樣都係歷史建築物，而佢哋介紹話最經典係呢排窗喎！

之後，我又俾大正硝子館〔吸〕咗返去，睇吓有無ｄ咩學，同．．．買

因為佢哋個工房學嘅杯俾Advance仲簡單，所以就行咗入佢哋高檔次品牌〔月下美人〕買呀．．．買咗兩支髮簪

兩支玻璃筆，有支係綠色嘅俾貓王兄，我哋有試過寫到先買架！

仲有呢條和服帶，佢原本有ｄ款係好靚可以自己配，但要四千蚊港幣都真係唔捨得俾，除非我係日本人啦

係我買到老公係邊都唔知嘅同時，我老公係出咗去影相！因為係大正出面就係運河嘅分支，當地人掛咗好多風鈴係河上，叮叮噹噹咁，真係好好聽嘅！

同時佢又影咗位學生，個學生仲以為佢係記者，用日文問佢影黎做咩？不過當北極熊用英文答佢之後，佢即刻走咗，我哋發現ｄ男仔係怕英文架！！

係〔月下美人〕買完嘢行過隔離（都係大正嘅地方），又俾我見到有嘢學噃！所以影低門口呢個牌入去話俾佢知我想學咩！

入到去，果然係手指指張相佢哋先明！最後我揀咗做筷子座！就係呢個時候，我發現唔見咗隻錶同手鍊，咁自己當然記得留咗係邊啦！咁我就即刻攞張單出黎，請大正嘅職員幫我打返去Advance話佢知我陣間去攞返，但點知，教我做杯個女仔親自送過黎俾我，仲要係用盒同泡泡紙包好嘅！可能佢打算連杯一齊寄俾我！真係唔該晒佢哋，咁細心！！

因為要等到十六號先可以攞，所以今次追唔到酒店，唔可以好似對杯咁，寄去酒店，唯有寄返香港啦！係２２號終於收到喇！！

離開大正之後，行無幾遠就俾ｄ香味〔吸〕咗入去，今次係．．．蠟燭

唔覺唔覺又到食飯時間嘞！今次我哋係返〔玻璃街〕食，見佢門口ｄ價錢合理，嘢食又好啱心水就入咗去！必食推介係燒海膽，一客有兩份，大約九百多日元，我哋要咗兩客，真係好食到想要第三客，但太飽嘞，唔好嘥！

北極熊當然唔會放過配啤酒啦！！小樽出品

北極熊嘅海膽丼，鋪滿飯面，睇見都流口水

我就要咗份薄燒牛肉，好大份呀，所以食唔到多一客燒海膽

食飽飽又繼續係〔玻璃街〕度行嘞！係呢度有幾間硝子館，有大有細，細鋪仔會將ｄ貨放到出街，所以就會傳黎叮叮噹噹嘅風鈴聲

之後我哋途經一間賣意大利琉璃嘅鋪頭，但個老闆都係北一架！就係係呢度買咗粒橙色〔琉璃玉〕，其實佢ｄ花瓶都好靚，又唔算貴，但唔想搬呀！

跟住我哋繼續行，又返到北一〔三號館〕，因為之前果日去到佢哋都差唔多閂門，所以無乜行過！咁咪再去買學生作品同行吓囉！原本我好想買個豉油樽俾母后，可惜我要個花無細size！但北極熊就買咗兩支酒，其中一支貓王兄同父王母后都話好飲喎！我哋仲搵到係太古城有得賣呀，但貴一倍囉！

買完嘢見對面有間做朱古力嘅，就即刻飛撲過去，但佢哋話只送日本，同埋又要等十四日．．．．咁！即係要下次再黎仲要係日本留十五日啦！！

離開間朱古力鋪之後都真係要去咗銀之鐘先，如果唔係母后ｄ杯點算？而且腳仔都好攰！於是我哋上咗三樓，果層無人，又有露天區！爽呀！！我哋可以係度慢慢咁影下對面音樂盒店同鐘樓

飲飽又休息夠，我哋就去近距離ｄ影吓鐘樓嘞，每個正點佢都噴煙架

其實北極熊都幾憎呢個鐘架！因為當六點，呢個鐘再響，附近ｄ鋪頭就會閂門！亦即係，我哋只有一個鐘係音樂盒館！入到去．．．又係有ｄ唔係好明，但以為有得玩嘅日文海報，所以一黎就上咗去先，而且我上次去都無上樓上！

唔上黎都唔知有隻日曆熊係度，佢哋仲已經轉咗第二日添

我哋留到佢哋播Auld Lang Syne先走！跟住就過咗對面銀之鐘隔離嘅鋪頭，佢哋收得比較遲，而且話自己ｄ Hello Kitty係北海道齊款，所以我又入咗去！而北極熊．．．投降，坐咗係出面！出黎果陣我買咗罐〔北極熊〕俾佢醒吓！但佢話好難飲喎！

之後我哋做咗樣好過份嘅事．．．就係由銀之鐘打的去淺草橋影黃昏！有黎過北海道，都知要行幾遠！但太攰啦！仲有大袋細袋呢！

原本一直都話唔係小樽買食嘅手信，但見到銀之鐘限定嘅曲奇同薰衣草戀人，結果都係大袋細袋！就係北極熊影黃昏嘅時候，我入咗貨艙等，點都好過係出面凍吖！！之後我哋仲食咗個BBQ放題，先去札幌！

但黎到札幌，又點可以唔食拉麵呢？我哋黎到一間叫寶龍嘅老字號，呢間係薄野總店，聽講佢間間ｄ味道都唔同架！

當然要有北極熊新歡，Sapporo Classic

呢個餃子唔啱我味道！

我幾鍾意呢碗麵個味，但ｄ麵有ｄ硬

呢碗就係北極熊嘅！但因為太油，所以．．．．肚肚．．．．

扮晒影北極熊，其實係影個師傅同客人

Day 3預告　－　札幌Yosakoi跳舞祭

為咗爭取時間，係我哋結婚之後果日嘅零晨，即係６月７日零晨，我哋就踏上飛機！清晨去到東京羽田機場，太陽都唔係好多，仲有ｄ黑！但我哋就要趕去攞行李轉機！因為要由國際線坐車去內陸機場！仲要前面唔知攪咩要開箱檢查，急死我哋啦！好彩都有時間多！仲可以買嘢飲同影吓相添！

原本見到呢兩樣食品好似好好味咁！諗住回程去買，不過最後係唔記得咗！

到鄉下lu！我成日都提住北極熊，北海道係一個鄉下地方！

去到札幌機場，先去買咗JR pass先，因為我哋好想搭動物園號，坐北極熊位！但原來果張北極熊櫈係只供拍照，無得指定席！不過都好總算攪掂咗要坐嘅車！

為免買錯飛同溝通有問題，所以影低呢兩張廣告俾佢哋睇！

呢架由機新千歲機場開出嘅JR都好企理吖！

係北海道好常會見到蒲公英，係好多好多！！

個零鐘就由新千歲黎到小樽，北極熊第一句係做咩好似係元朗咁架！？我都係答果句啦！鄉下地方係咁架啦！

一落車，〔嘩！？做咩咁凍？？？〕好彩有褸！！

你睇吓！佢哋無論係ｄ燈，個鐘同站頭個名牌都好有懷舊feel架！！

由於只有日文，所以我哋唔知呢位先生同個車站或者小樽有咩關係？！總之佢對呢道好重要囉！原本仲有間好似博物館咁嘅房仔架，但無開呀！

係離開車站果陣見到呢張相，係同我哋係網上book果間酒店一樣樣，所以即刻影低佢，諗住有地址同樣會好易搵到，但．．．．．原來只係似樣唔係同一間！仲要係我哋搵緊佢果陣有位好好人嘅嬸嬸埋黎，我哋俾佢睇完，佢好有信心咁，帶咗我哋去呢到！但去到人哋話無我哋個名，攪咗一輪先知去錯咗，因為兩間個樣好似，可能係網都放錯相！所以就係人哋間酒店到食件cake先走嘞！

之後我哋就攞住經理俾我哋張地圖再行過去！途中經過呢個景點，係以前嘅火車軌，好多旅遊書都有介紹，但．．．唔知為咩要睇呢，可能我哋唔係日本人，唔會明白！呢ｄ咪係民俗同歷史囉！

好鍾意北海道ｄ渠蓋，唔同地方有唔同公仔，小樽代表－水瀨

原來我哋book果間酒店有幅好靚嘅玻璃畫架！仲係對條住運河做到古式古香咁！

而原來鬼馬嘅北極熊係同酒店講明我哋係黎honey moon，做咗個special booking，所以酒店送咗一支酒同一個琉璃鍊墜俾我，好靚呀！！（當然要＄）

由於時間尚早，未有房，所以我哋放低ｄ行李係酒店就走咗去玩嘞！我一黎就俾大正硝子館〔吸〕咗入去，買呀！！！而北極熊就係門外影相！大正將自己嘅範圍佈置到好浪漫架！佢專登掛ｄ水晶上樹！

我哋買咗呢個，同買咗另一組俾河生河太

而係小樽運河附近嘅遊客區，好多店鋪同建築物都係好有歷史嘅，佢哋仲會有個牌係隔離話你知係咩添！

呢間係其中一間歷史建築物－浪漫館，但入面一ｄ都唔浪漫！嘥我ｄ時間！！

係附近間間都係古建築物

呢座出拔小路出名係有好嘢食，不過唔知係咪星期一，好似唔開咁？！無人架！

結果．．．我哋食咗餐好難食嘅晏，嘥咗我一餐！！

難食海膽粥，香港好食過佢

食飽飽（難食啫，都飽嘅），繼續向遊客區買呀！！途經一間鋪，佢哋養咗三隻金毛，好乖任摸，同懵盛盛！

之後北極熊仲扮．．．．

我哋去到小樽一心想〔吹玻璃〕所以就去咗好大集團嘅北一硝子館，睇吓有無得學啦．．．．．．．

亦因為唔知日文，見到呢張海報就好開心咁以為有得學嘞，但原來係賣佢哋ｄ學生作品咁解！雖然係學生做，不過我都買咗

就係呢個紫色心同四葉草嘞，佢哋係唔同光線下係會變做透明架

同埋係之前我哋又俾另外一間賣意大利硝子嘅店〔吸〕咗入去，買咗呢個

之後就繼續向銀之鐘行過去，因為貓母后話要咖啡杯嘛！點知．．．我哋中間又俾其他嘢〔吸咗〕入去，所以去到佢哋收咗工lu！佢哋好準時呀！！

同埋係附近再影吓相咁就返酒店嘞

嘻嘻！！見我第一日就已經有咁大袋，就知我買得幾開心啦！！

返到酒店最重要係．．．．北極熊要瞓陣覺，同換過件褸，因為由香港成三十度去到果邊得十幾度，都真係唔多慣！夜晚我哋去咗貨艙果邊食，途經運河有位阿叔係幫人影相嘅，當然係收錢啦！但北極熊見佢係用Rolleifles影，所以都幫襯吓佢，之後佢話係會寄返黎俾我哋，同埋佢仲幫我哋用自己機影咗幾張！北極熊諗佢會唔會email俾我哋就算，因為百二日元，晒完仲要寄，佢會唔會無錢賺呢？結果我哋係廿一號收到lu！

另外因為係星期一同埋有ｄ夜，所以一係放假，一係收咗，同埋唔想去酒吧食，所以揀咗呢間（係淺草橋口）

呢間係食日式咖哩，雖然我同北極熊叫唔同嘢，不過賣相都差唔多，但最重要係呢餐無嘥到好好食嘛

另外好鍾意佢呢個忌廉粟米湯，好香好甜同有粟米味

而炸雞同燒魷魚亦都係唔錯嘅小食！可惜仲咳緊，唔敢食太多！

食飽飽出到黎雖然係凍，不過都要影吓運河夜景嘅！因為上次同貓母后去係跟團無得留到咁夜架！！

香港人始終習慣夜瞓，所以即使ｄ鋪頭閂晒門，都鍾意四維行！所以我哋就係附近行咗陣先返酒店，就係咁．．．俾我哋發現咗可以〔吹玻璃〕嘅地方，不過，佢已經閂咗門！

返到酒店，北極熊係售賣機買咗罐佢話好好飲嘅啤酒

Day 2預告　－　吹玻璃

好多謝各位係６月５日出席咗我哋個婚禮！特別要多謝阿工太個細仔，因為我哋個婚禮而要遲咗幾日先可以出世，真係唔好意思嘞！不過係阿媽個肚入面住多幾日，咁！阿工太就可以俾少幾日奶粉錢啦！！

講真，果日有ｄ咩招呼唔到，又或者邊位親朋好友未影到相嘅就真係唔好意思！因為．．．．我果日真係咩都唔知咁就過咗！總知係有人埋黎我就影相，ｄ兄弟姊妹話夠鐘做咩，我就做咩！係我可以有自己思想以黎都係第一次咁唔知自己做緊咩！

先講吓我有印象嘅出嫁前夕！係屋企好趕咁（限時辰嘛）食完飯，沖涼，上頭同食湯圓！之間又攪li攪lo咁，攪咗陣，因為好怕帶漏嘢！跟住一瞓就瞓到化妝師阿Kei黎到（約咗６點）！哈哈！超唔好意思！係佢黎到我先醒！跟住好快咁洗面刷牙，就開始化妝嘞！無幾耐班要化妝嘅姊妹都黎到，佢哋一黎到就笑到飛起，因為夜更個看更唔知我嫁，問佢哋黎做咩，仲問佢邊幾個邊個係新娘，所以大家勁笑！

化妝同食早飯中，因為預咗無得食，結果做咗姊妹佈景

之後屋企人亦都出現係我屋企，所以人亦都越黎越多！最後連攝影師們都黎埋，佢哋入黎果陣，我都真係嚇一跳！乜有５個咁多嘅？！我無俾咁多錢架噃！我俾咗個plan係３個人架噃？！不過無所謂嘅，大家鍾意黎影咯，咪黎囉！

姊妹無聊就會影相架喇

係我著好褂之後影咗一張．．．．

跟住就影吓相等北極熊佢哋黎嘞！當然佢黎到我係要留係房嘅，但因為預咗北極熊要彈琴俾我聽同方便影相，所以係無閂房門！

我預咗三首歌俾佢抽，結果．．．佢太耐無練琴喇！！

係我哋敬茶嘅時候，辛苦河童有重要任務

之後我哋要好快咁去酒店敬茶俾奶奶同換衫，因為要趕住十一點九去到教堂！好彩當日有河太同Yoko係教堂，仲要因為本禮儀手冊排錯版攪到要ｄ同事即場幫手，真係唔好意思呀！！

其實我入去果陣係咩都睇唔到架！因為個頭紗係遮住朦查查架！

好多謝有關神父為我哋主禮，因為佢令大家都好開心！當然最緊要係簽字啦！

好鍾意阿Rex呢張，影果陣神父佢哋係前邊簽緊名，好有偷情feel！

行完禮，當然係要影好多大合照啦！就係我哋兩個E號笑容果陣，班兄弟姊妹都影咗相靚相！

家姐好彩有你係度，幫我影呢班鍾意影相嘅女子！同兄弟！

當然大合照一定有大家份啦

行完禮又影完相，就係我哋放飯嘞！不過食完飯都仲有節目，就係去魯班廟影相，原本係Pre-wedding果陣影嘅，但果陣裝修緊，所以再去補返！不過班姊妹太攰所以就無跟我哋去嘞！

跟住再去埋西環邨果邊影相同畫畫

同時間我班姊妹就留咗係酒店房瞓覺，係咪好〔香艷〕呢？為免佢哋唔好意思，所以．．．．．大家估吓啦！

再要係五點前返到酒樓，都真係幾趕架！當然返到去又要再set頭轉妝咁啦！然後繼續E號笑容！基本上係無自主權，總之佢哋安排咩，我就做咩咁啦！所以．．．

我無得食恨咗好耐嘅蛋糕，我特登去訂架！！嗚嗚～～～～

亦都唔記得攞返個menu！！

話咁快就係最後階段嘞!上個禮拜二就去咗教堂彩排,原本都已經約咗班姊妹一齊去,但教堂秘書話唔駛,因為到時我會唔得閒理佢哋,咁!好啦,叫佢哋自己睇吓黎唔黎啦!但原來….係應該叫埋佢哋黎架,因為佢哋係可以同我一齊行紅地毯架,但家陣無得俾佢哋試喇!

不過就俾我哋撞返同我哋一齊見秘書同一齊上堂果對情侶,因為佢哋係廿六號結婚,所以佢哋問我哋可唔可以黎睇!咁!當然可以啦!一於到時見啦!

最攪笑係我哋對花仔花女,阿家姐同細佬,一個鍾意扮蛋糕,一個一著件褸就讚自己靚仔,好好笑!

結婚－－係俾自己買嘢一個好好嘅藉口，所以上個禮拜，貓女王就四出咁去shopping！先黎同貓父王貓母后去買梳，我同北極熊都真係比較鍾意譚木匠嘅梳，所以一黎先去天星碼頭度睇吓先！佢原本有三對唔同款嘅梳，不過我哋鍾意果對有ｄ瑕疵，所以要等佢哋搵人係中環站攞另一對過黎，但因為係佢哋食飯時間所以無人，咁就要等一個鐘嘞！既然係咁，就先去尖咀中藝先啦！因為我要去買出門傘嘛！老老實實，除非把傘係有HelloKitty架啫，如果唔係，我都真係唔會攞住把紅當當嘅傘出街，真係扮鬼咩！

去到中藝，我原本都真係諗住買把傘就走，點知貓母后越睇越興奮，結果唔只買咗傘，仲買咗個首飾盒同首飾包，佢諗住到時一次過用一個盒攞出黎方便ｄ喎！

係中藝shopping完又坐返船返去，check吓把梳有無咩唔得，又真係呢對好ｄ喎，連ｄ色都靚ｄ喎！咁！就呢對啦！之後同咗貓父王同貓母后去食個tea咁就走嘞！！

跟住過咗幾日，我哋要去細表姐到驗身，所以好合理咁又去咗粉嶺同姑姐姑丈飲茶！原本飲完茶我哋打算去花墟嘅！但因為北極熊係第一次去姑姐度，所以又八八掛掛咁去咗行吓ｄ商場！不過唔行由自可，一行又破產！先黎見到對HelloKitty香檳杯，雖然香港有，但平ｄ嘛，所以即買！之後行過隔離商場，見到套好靚嘅HelloKitty file又買，結果咁就係粉嶺洗咗八舊水！跟住因為我哋一揪二lun所以取消咗去花墟呢個念頭！轉為去灣仔買鞋！亦因為我係一眾褂舖睇唔啱ｄ鞋，所以聽阿河太話，去咗玩具街睇吓！又俾我睇啱咗喎！！所以，買！亦係結婚shopping入面最平嘅一樣嘢，多謝五十九蚊吖！！

我話要買呢把傘，貓母后問落雨點算？不過貓父王幫我！嘻嘻！！

我哋揀咗好耐最後買咗呢個有兩層嘅首飾盒

仲有一套兩個嘅首飾包包

譚木匠個標誌

佢個盒嘅setting係一張床同兩公婆咁解

合埋係一個蛋形同一個心形

呢個袋係用黎袋住男仔隻梳架！

破產嘅開始－－HelloKitty香檳杯

我最愛的繡花鞋，只需五十九蚊